Joan den larunbatean, apirilaren 16an, Eibarko Kontsumo Arduratsuaren Azokaren VI. edizioa ospatu zen. Egoaizia GKEak antolatu zuen, eta REAS Euskadik parte hartu zuen, Ekonomia Sozial eta Solidarioaren (ESS) ekimenei buruzko sentsibilizazio-hitzaldi bat emanez.
AzokaN, justizia sozialean eta ingurumenaren kontserbazioan oinarritutako beste kontsumo modu bat ezagutarazi zen. Untzaga plaza eibartarrak kontsumo arduratsuko proiektuak zituzten 20 ekimen baino gehiagoren parte-hartzea izan zuen; horien artean, Euskadiko Merkatu Sozialeko hainbat erakunde, hala nola GoiEner energia berriztagarria, Kidenda bidezko merkataritzako denda edo Fiare banku etikoa. UPV/EHU ere bertaratu zen, garraio jasangarriko zenbait aukera hurbilduz jendeari, hala nola auto elektriko bat edo energia sortzen duen bizikleta bat.
Produktuen postuez gain, azokak agenda oso bat izan zuen, erakusketekin, haurrentzako tailer batekin, zuzeneko musikarekin eta bi hitzaldirekin; lehenengoa Farmacookek eman zuen elikadura osasungarriari eta jasangarriari buruz, eta bigarrena REAS Euskadiren eskutik, ESSri eta Merkatu Sozialari buruz. Era berean, bizikletak konpontzeko tailerra eta mugikorrak birziklatzeko postu bat ere izan ziren azokan.
