Kategoriak
Ekintzailetza REAS Euskadi

REAS Euskadik modu presentzialean parte hartu du GSEFen V. edizioan, Mexiko Hirian, 2021eko urriaren 4tik 8ra bitartean. Gainera, Foroan Ekhilur sarea eta Finantzaz Haratagok haien ekimenak aurkezten ere parte hartu dute.

Ekonomia Sozialaren Foro Globala (GSEF, ingelesezko sigletan) Ekonomia Sozial eta Solidarioaren (ESS) munduko sare bat da, eta ESSko entitateak, tokiko gobernuak eta erakundeak biltzen ditu, bai eta arlo horretan interesa duten ikertzaileak eta gizarte-eragileak ere dira  ESS sustatzen dutenak, bidezkoago eta iraunkorrago den mundu bat eraikitzeko tresna gisa.

Aurten, Foroaren gaia tokiko gobernuen eta gizarte-ekonomiaren arteko harremanean zentratu da, ekonomia berde eta inklusibo baterako ibilbideak elkarrekin sortzeko helburuarekin. Galdera gidaria honako hau izan da: zein izan beharko dira pertsonen, gobernuen, taldeen, gizarteen, herrialdeen ekintzak edo estrategiak, mundu hobea eta inklusiboagoa lortzeko? Zer funtsezko ekintza bultzatu behar dira tokian-tokitik?

Covid19ak sortutako ziurgabetasun-egoera dela eta, ekitaldia formatu hibridoan egin da, Mexiko Hiriko José Luis Cuevas museoan kokatutako aurrez aurreko panelistak eta 50 herrialde baino gehiagotan zeuden panelista birtualak konbinatuz. Emaitza: 60 jarduera baino gehiago 3 hizkuntzatan, 70 hizlari baino gehiagoren parte-hartzearekin; 200 pertsona baino gehiago aurrez aurre eta 6.000 birtual baino gehiago parte-hartzaile gisa.

2021eko edizioa Latinoamerikan egin den lehena izan da, eta bai ekonomia solidarioa eta  bai ESS proiektuak ikusarazteko ikuspegi argiagatik nabarmendu da aurtengo edizioa. Gizarte parekideak eta inklusiboak sortzeko ESSak duen potentziala erakutsi nahi izan da, hori lortzeko hainbat eragile konprometituz.

Blanca Boix-en hitzartzea GSEF 2021n

Foroaren barruan, REAS Euskadik Ekonopoloaren proiektua aurkeztu zuen, “Tokiko aliantzen esperientzia arrakastatsuak” hitzaldian. Ekonopoloa, Ekonomia Sozial eta Solidarioko Poloa, Bilbao Ekintzak eta REAS Euskadik elkarrekin sortutako proiektua da, Bilboko San Frantzisko auzoan kokatua. ESSaren inguruan lan egiten duten hainbat eragilek topo egiteko eta esperientziak, proiektuak eta baliabideak partekatzeko erreferentzia-espazio bihurtu nahi du; aldi berean, ESSaren beraren bozgorailu izanez. Aurten bere ibilbideari ekin dio ESSan ekintzailetza-programa bat bultzatuz, Erosketa Publiko Arduratsua sustatuz eta herritarrak ESSaren inguruan sentsibilizatuz Merkatu Soziala indartuz.

Irakurri kronika osoa erantsitako dokumentuan.