Asteazkenean, uztailak 15, beste aurrerapauso bat eman genuen gure ibilbide komunean. Gure aliantza historikoa hurrengo mailara eramango duen lankidetza hitzarmen berri bat sinatu genuen. Akordio hau ez da abiapuntu bat, baizik eta konpromiso partekatu baten bilakaera, Euskadin Ekonomia Sozial eta Solidarioa (ESS) sustatzeko egiten ari ginen lan bateratua indartzea, eguneratzea eta optimizatzea bilatzen duena.
Esparru berritu honekin, bi sareek gure aliantza politiko eta soziala berresten dugu. REAS Euskadiko 139 erakunde bazkideen eta Gizateako 40 gizarteratze-enpresen potentziala batzen dugu – horietako 21 dagoeneko bi erakundeetan parte hartzen ari direlarik –, eredu ekonomiko eraldatzaile bat indartzeko. Elkarrekin, bizitzaren iraunkortasuna, justizia soziala eta inklusioa euskal agendaren erdigunean jartzearen aldeko apustua egiten jarraitzen dugu.
Elkarrekin indartuko ditugun lehentasunezko ildoak
Lankidetza-etapa berri hau gauzatzeko, elkarrekin lan egiteko lau ardatz estrategiko bultzatuko ditugu:
- Erosketa Publiko Arduratsua: Estrategia koordinatua mantenduko dugu euskal administrazio publikoen aurrean, merkatu-erreserbak eta klausula sozialak eraginkortasunez aplikatzea eskatzeko.
- Merkatu Soziala eta Inklusiboa: Aurrera egingo dugu gure produktu eta zerbitzuen katalogoen arteko interkonexioan, eta, gainera, REAS Euskadiren Auditoria Sozialaren eta Gizatearen Balantze Sozialaren arteko osagarritasuna aztertuko dugu.
- Elkarrizketarako eta eraginerako espazioak: Diskurtso eta jarrera komunak eraikiko ditugu funtsezko foro eta erakundeetan, sektorearen interesak modu bateratuan defendatzeko.
- Sinergia berriak eta komunikazioa: Barne komunikaziorako kanal egonkorrak irekiko ditugu, elkarren ezagutza hobetzeko eta gure urteko planetan partekatutako ekintza berriak diseinatzeko.
Hitzarmen berri honek etorkizunari egitura berritu, indartsu eta kohesionatuago batekin begiratzeko aukera ematen digu, beste ekonomia bat posible izateaz gain, dagoeneko elkarrekin eraikitzen ari garela erakusten jarraitzeko.
