2025eko otsailaren 4an hasi ginen prESStatzen programaren laugarren edizioa, Ekonomia Sozial eta Solidarioaren (ESS) barruan proiektuak bultzatzeko diseinatutako programa. Aurten, 24 orduko formakuntza eta networkinga eskainiko dugu, proiektu bakoitzarentzat 20 orduko aholkularitza pertsonalizatuarekin batera.
Ekintzailetza soziala indartzeko programa bat
Ekimen kolektiboak garatu, elkarteak profesionalizatu edo enpresak ESS ereduetarantz eraldatu nahi dituztenei zuzenduta, prESStatzen 2025 Bilboko Ekonopoloan garatuko da, otsailaren 4tik maiatzaren 30era.
Aniztasuna parte hartzen ari diren 13 ekimenetan
Deialdia arrakastatsua izan da, 24 eskaera jaso ziren ohikoak diren 10 plazetarako. Eskaera handia eta proposamenen potentziala ikusita, hiru proiektu gehitu ditugu taldera, kanpoan gelditu direnei ere formakuntzetara etortzeko aukera zabalduz.
Proiektu parte-hartzaileak komunikazioa, kultura eta arteterapia bezalako sektoreetakoak dira. Gainera, airea eta ura araztean oinarritutako bioteknologia proiektu bat nabarmentzen da, baita hiru aholkularitza proposamen ere: bat klimaterioan espezializatutako sexologiarekin lotuta, beste bat maskulinitateekin, eta azken bat zahartzaroari laguntzeko. Etxebizitza kooperatiboa erabilera lagapenean sustatzeko elkarte bat eta ekoizpen agroekologikoko ekimen bat ere sartu dira.
Ekintzaile taldeen artean, seik migratzaileak barne hartzen dituzte. Emakumeek gidatutako ekimenak ere sei dira, hiru talde mistoak dira, bik gizonak dituzte buru eta batek bitarrak ez diren pertsonak.
Formakuntza eta topaguneak
Programak zazpi saio eskainiko ditu, ESSaren balioetatik negozio proposamenak garatzeko tresnak eta estrategiak ezagutzeko. Lehenengo saioan Ekonomia Solidarioaren printzipioak eta ekiteko aukerak aurkeztu ziren. Bigarrenean, negozio eredua landu zen Canvas Sozialaren bidez, akonpainamenduaren tresna nagusia.
Hurrengo saioan, otsailaren 18an, “Erakunde Bizigarriak” kontzeptua landuko da, ekitatean eta jasangarritasunean oinarritutako kudeaketa ereduak aztertuz. Bideragarritasun ekonomikoari, marketinari, erantzukizun ekologikoari, lurralde sustraitzeari eta ESSan ekiteko egitura juridikoei buruzko prestakuntzak ere egongo dira.
Maiatzean, ekimenek beren aurrerapenak aurkeztuko dituzte, eta ekosistema ekintzailearekin eta ESSarekin loturak ezarriko dituzte, itxiera jardunaldi batean.
Aholkularitza pertsonalizatua
Proiektu bakoitzak ESSan aditua den tutore bat izango du bere garapena gidatzeko. Aholkularitzako 20 ordutan zehar, talde bakoitzari egokitutako ibilbide bat diseinatuko da. Gainera, bi saio espezifiko egongo dira negozio ereduan ikuspegi feminista eta aniztasuna zeharka txertatzeko, arloko espezialistek aholkatuta. .
