REAS Euskadik modu presentzialean parte hartu du Dakarren 2023ko maiatzaren 1etik 6ra bitartean egindako GSEFaren VI. edizioan, Ekonopoloko ekintzailetza arloa aurkeztuz, Bilboko Udalarekin batera sortutako ekimen publiko-soziala.
Bi urtean behin, Ekonomia Sozial eta Solidarioaren Foro Globala (GSEF) antolatzen da, kontinente guztietako hiri kideekin lankidetzan. Ekitaldia funtsezko gertaera bilakatu da ESSarentzat, haren dinamismoaren islada. Edizio bakoitzean, adierazpen lotesle bat hartzen da hiri anfitrioientzat eta parte-hartzaileentzat, eta pertsonengan oinarritutako ekonomia honen alde lan egiteko konpromisoa formalizatzen du, garapen jasangarriaren helburuak lortzeko funtsezko tresna baita. Topaketa hau plataforma pribilegiatua da elkar ikasteko eta ekonomia sozial eta solidarioaren alderdi guztiei buruzko ezagutzak eta ikuspegiak trukatzeko.
GSEF Ekonomia Sozial eta Solidarioaren (ESS) sustapenarekin konprometitutako tokiko gobernuen eta gizarte zibileko sareen mundu mailako sarea da, pertsona guztiei mesede egingo dien eta tokiko garapen emantzipatzailea sustatuko duen alternatiba ekonomiko gisa, pertsonengan zentratuta eta ingurumena errespetatuz.
Aurten, Foroak protagonismo berezia eman nahi izan die gazteei zein emakumeei, eta, horretarako, egun propioak izan dituen ibilbide bat sortu du, haiei ahotsa emateko. Maiatzaren 1etik 2ra bitartean gazteen karabana antolatu zen, batez ere Senegalen, belaunaldi berrien errealitateak eta beharrak hurbiltzeko. Maiatzaren 3an emakumeen txanda izan zen, genero desparekotasuna landuz eta ESSko ekimenetatik abian jarritako esperientzia arrakastatsuetan arreta jarriz.
Foro nagusia maiatzaren 4tik 6ra egin zen, eta ekonomia informaletik ekonomia kolektibo eta iraunkorretarako trantsizioarekin lotutako erantzunak eztabaidatu eta soluzioak proposatzean oinarritu zen.
ESS sareak eta tokiko agintariekiko lankidetza
Maiatzaren 5ean, REAS Euskadiko Blanca Boixek arlo publikoaren eta sozialaren arteko lankidetzari buruzko mahai-inguru batean parte hartu zuen, lurraldean ESSaren ekimenak sustatzeko. Bilboko Udalaren eta REAS Euskadiren ekintzailetza-proposamen bateratuaz gain, beste 3 erakundek ere parte hartu zuten mahaian, IUT Bordeaux Montaigneko Aurélie Carimentrandek dinamizatuta:
- Kalidou Toure, Entrepreneurs du Monde, Senegaletik
- Ali Akebli, Targa-Aide, Marokotik
- Mawuko Anani Afangnibo Ekuhoho, Anavie GKEa, Togotik
6.000 parte-hartzaile baino gehiago
GSEFren edizio honek, Afrikan egindako lehenak, jende ugari mobilizatu du. 3.000 pertsonak eman zuten izena online plataforman maiatzaren 1aren bezperan, eta beste 3.000 parte-hartzaile berri izan ziren Foroan zehar, batez ere Dakarrekoak eta Senegalgoak. Guztira, 6.000 lagunek parte hartu zuten astean zehar, bai Gazte’ESS eta Emakumea’ESS pre-Foroetan, baita Foro Nagusian ere.
Foroak 203 erakunde publiko eta instituzionaletako (tokiko eta nazioko gobernuak) ordezkariak batu zituen, 661 partaide instituzional izanik. Foroak bertan ere arrakasta handia izan du ere, senegaldarren parte-hartze garrantzitsuarekin. Ordezkaritza handiena izan zuten herrialdeak Senegal, Frantzia, Kamerun, Kanada, Boli Kosta, Maroko, Gabon, Ginea-Bissau, Mali eta Mauritania izan ziren.
Bideo laburrak ekitaldiaren alderdi esanguratsuenak nabarmentzeko.
