Joan den maiatzaren 19an ospatu zen Ekonopoloaren programa soziokulturalaren bigarren jarduera. Oraingoan, bertako produktu agroekologikoen aurkezpena eta dastaketa egin zen.
Jarduera horretara 40 pertsona joan ziren, eta Kidekoop Bilbo Zaharreko eta inguruko kontsumo elkartean kontsumitzen diren produktuak dastatzeko aukera izan zuten. Erakunde honek (REAS Euskadiko bazkidea) elikadura-subiranotasuna, ekoizleen eta kontsumitzaileen arteko bidezko harremanak eta eredu sozioekonomiko eta kontsumo alternatibo baten aldeko apustua sustatzea du helburu. Horrela, hurbileko produktuak, agroekologikoak eta bidezko merkataritzakoak banatzen ditu bitartekorik gabeko harremanen bidez, prozesu osoan gardentasuna bermatuz.
Parte hartu zuen, halaber, Kidekoopekin lan egiten duten ekoizleetako batek, Unaik, Itturbaltza Artisu Elikagaiak baserrikoak, Mungian abereak hazteko eta haragiak irizpide ekologikoekin merkaturatzeko etxalde birsortzailea, abeltzaintza birsortzailearen eta holistikoaren inguruko prestakuntza- eta sentsibilizazio-jarduerak garatzen dituena.
Jarduera hori Elika Bilboren jarduera-astearen barruan kokatu zen. Ekimen hau hainbat kolektibok bultzatu dute, Bilbon elikadura-subiranotasuna bultzatzeko eta elikaduraren esparruan kontsumo arduratsu eta eraldatzailea sustatzeko, tokiko produktuak eta agroekologikoak ekoizten eta merkaturatzen dituztenei lagunduz.
Jardueran, REAS Euskadin parte hartzen duten eta arlo horretan lan egiten duten beste ekimen batzuk ere ezagutu ahal izan ziren, hala nola Goilurra edo Sustraiak Catering.
Dastaketa amaitzeko, topa egin genuen elikadura-subiranotasunaren alde, gure elikadurari modu osasungarri eta bidezkoan eusten dioten ekoizleengatik eta, ekonomia sozial eta solidarioaren esparruan, ekoizpen, merkaturatze eta tokiko kontsumo proposamenak garatzen dituzten ekimen guztiengatik.
