REAS Euskadik prozesu bat hasi du euskal erakunde publikoek erosketa publiko arduratsuaren praktikak sustatzeko konpromisoa duten gizarte-erakundeen foro bat sortzeko.
Erosketa publiko arduratsua politika eta praktika instituzional bat da, ondasunak, produktuak eta zerbitzuak erosteko eta kontratatzeko prozedura publikoetan gizarte- eta ingurumen-irizpideak txertatzean datzana.
Ekonomia sozialagoa eta solidarioagoa bultzatzeko potentzial handiko tresna da, eta, gainera, gizarte-ongizatearekin, enplegu duinaren sustapenarekin eta tokiko giza garapen iraunkorrarekin lotutako beste politika publiko batzuk bultzatzen ditu.
Hala ere, aurrerapenak egin diren arren, potentzial hori oraindik ez dago behar bezala garatuta, eta hori egitea oso garrantzitsua dela uste dugu. Horretarako, REAS Euskadik Erosketa Publiko Arduratsuaren aldeko Euskal Foroa sortzea sustatzen du, politika horretan oro har interesa duten edo sektoreko esparruetan (berdintasuna, ingurumena, lan-baldintzak, laneratzea, bidezko merkataritza, etab.) klausula horiek bultzatzen parte hartzen duten erakundeak bilduko dituena. Izan ere, erakunde horien artean lan partekatua garatu nahi da, helburu sektorialetatik harago, eragin handiagoko erosketa publiko arduratsuaren politika globala garatzeko baterako proposamena bultzatu ahal izateko.
Foroa 2022an aurkeztuko da, eta helburua da gizartea eta bere eragileak sentsibilizatzea praktika horren garapenaren garrantziaz, bai eta eragin politikoa duten proposamenak sustatzea ere, erakunde publikoek arlo horretan duten jokabidea nabarmen aldatzeko eta erosketa publiko arduratsuaren praktika orokortzeko.
Prozesu horren hasiera Kontsumoari Bira proiektuaren barruan kokatzen da. Bizkaiko Foru Aldundiak eta Bilboko Udalak batera finantzatzen dute, eta kontsumo kritiko, kontziente eta eraldatzailearekin lotutako beste jarduera batzuk bultzatu ditu, bai erakunde publikoetan, Erosketa Publiko arduratsua bultzatuz, bai gizartean, ekonomia sozial eta solidarioaren merkatu soziala indartuz.
